Епіфаній Дровняк – Никифор 1895-1968
Єдним з найбарже знаных Лемків на світі єст Епіфан Дровняк, званий Никифором Криницким.
Был малярйом – примітивістом, то значыт артистом самоуком. Вродил ся 21 мая 1895 р. в Криниці. Никифор не мал легкого дітинства. Выховуваний лем перез маму, од початку был хворотливий, мал тіж проблеми зо слухом і бесідом. До школи ходил барз коротко, але навчил ся кус рахувати, чытати, і писати великима буквами.
Мал за то винятковий малярский талант. Рысувати і малювати навчил ся сам. Никифор до малюваня не потрібувал за дуже. Старчал му олівец, кредки і найтуньши шкілни фарбки. Малювал на вшыткым што мал під руком: кавальчиках тектуры, паперя, урядових друках, обкладинках шкілних зошитів, а навет на пуделках од патычок.
Криницкого маляря можна было спіткати в ріжних пунктах міста, як ходил з деревяном валізочком, в котрій носил своі малярски атрибути. Темом для його прац была Лемковина – рідна Криниця, церковці, святи, краєвиди і портрети – головні курацюши. Часто тіж малював автопортрети. Його праці виставлани были в Парижі, Варшаві чи Відні. Никифор створил парудесят тісячи малюнків, на жаль векшіст зостала знищена або загинула. Епіфан Дровняк вмер 10 жовтня 1968 р. в Фолюшу коло Ясла.